Pages

Tuesday, May 27, 2025

आठवण

धुंद पहाटे धुक्याची दाट दुलई ओढताना

पक्ष्यांचा मधुर किलबिलाट ऐकताना

  येईल का माझी आठवण 

पूर्वदिशेची सहस्ररश्मीची स्वारी दिसताना

गवतावर चमचमणारे दवबिंदू पहाताना

  येईल का माझी आठवण 

इवली फुलं पहात रानीवनी फिरताना 

विहरणारी रंगीबेरंगी फुलपाखरे दिसताना

  येईल का माझी आठवण

शुभ्र मोगऱ्याचा मादक गंध अनुभवताना

नाजूक रातराणीच्या गंधाने रात्र मोहरताना

  येईल का माझी आठवण

शांत बसूनी गीत झऱ्याचे ऐकताना

चित्र मनातले कुंचल्याने रेखताना

  येईल का माझी आठवण

सागरतीरी फेसाळत्या लाटा बघताना

ओल्या वाळूवर पावलांचे ठसे उमटताना

  येईल का माझी आठवण

कधी अतीव आनंदाच्या क्षणी फुलताना

कधी अव्यक्त एकाकीपण जाणवताना

  येईल का माझी आठवण

  येईल का माझी आठवण

- स्नेहल मोडक

Friday, May 16, 2025

नभांगण

निसर्ग कुंचला

आकाश कागद

कुंचला फिरतो

सप्तरंग सांडतो

गुलाबी जांभळा 

पांढरा निळा

केशर पिवळा 

सुंदर रंगछटा

आभाळ रंगते

रंगरेषा बदलते

मन रंगविभोर

तरल भावरंग

मनमोहक मेघ

रंगमय नभांगण

- स्नेहल मोडक


 

  

Saturday, May 3, 2025

सोहळा

उमलती पहाट

कोवळा प्रकाश

सकाळचे सहा

मी माझ्या खिडकीत

आतुरता आगमनाची 

उगवतीवर केशर

तळाशी मेघसावळा

खगांची उडती नक्षी

किंचित केशरकोर

अलवार कोर वरती

केशरवर्तुळ पूर्ण 

मी फक्त मंत्रमुग्ध 

तरल मेघातून वर

क्षणांत कनकगोल

सोहळा सृजनाचा

नित्य नवा अनुभव 

नित्य नवा अनुभव 

- स्नेहल मोडक



कविता

वारी

सरतो हळूहळू चैत्र, वैशाख, ज्येष्ठ अवतरतो मग पावन आषाढ श्रेष्ठ चालती वारकरी सारे वाट पंढरीची हाती टाळ अन गळा माळ तुळशीची सदा करती मुखाने विठ्...