Pages

Wednesday, August 28, 2024

सांज

उसळती शुभ्र फेसाळ निळ्या सागरलाटा

अवतरते सांज सुरेख गोजीरी सागरतटा

होतसे अधीर कनकगोल हा सागरभेटीस

रंगविभोर होई पश्चिमा रवी येता दिठीस

झेपावती विहग घरट्याकडे आपल्या

सांजरंगात साऱ्या सावल्या दाटल्या

सळसळते बन ते माडांचे होतसे शांत

गजबजला सागरकिनारा होई निवांत

अंधारल्या सागरतीरी मग एकले बसावे

अन गाजेसंगे भावलहरीत तल्लीन व्हावे

विध्द जाहल्या मनास हलकेच सावरावे

होऊनी कुंचला भावचित्र सुरेख रंगवावे

पुनवेच्या चांदव्याने मग नभी अवतरावे

अन अवकाशीचे ते चांदणे मनी उतरावे

- स्नेहल मोडक

Thursday, August 8, 2024

थेंब . . .

आताच बरसात आहे थांबली

पर्णे थेंबांच्या नक्षीने सजली

थेंब दोन टपोरे असती पारदर्शी

जणू आरसे बिलोरी भावस्पर्शी 

रुप सृष्टीचे साजीरे त्यात दिसते

पाहता प्रतिमा सुंदर मन मोहते

दोन पाचूच जणू सुरेख लगडती

गुंफताच शब्दात काव्यच होती

गुंफताच शब्दात काव्यच होती 

- स्नेहल मोडक


  


Monday, August 5, 2024

श्रावण

आला श्रावण श्रावण 

ऋतू हा मनभावन 

कधी रिमझिम बरसे

कधी उन्हाचे कवडसे

भूवरी पाचूचे शिंपण

नभी इंद्रधनुचे तोरण

पर्णात मौक्तिकमाला

गंध मातीचा ओला

व्रतवैकल्ये ही खास

झुले बांधती झाडास

कान्हा वाजवी पावा

राधेस धाडी सांगावा

ओलेत्या सांजवेळी 

भेट ती यमुनाजळी

ऋतू हा मनभावन 

आला श्रावण श्रावण 

- स्नेहल मोडक

Sunday, August 4, 2024

मैत्री ???

व्याख्या मैत्रीची पुस्तकातच वाचायची

अन स्वप्नातल्या दुनियेत अनुभवायची

     असतेच का मैत्री जिवापाड जपणारी

     आली वेळ तर जीवाला जीव देणारी

वापरा अन फेका चा जमाना आलाय 

अगदी मैत्रीतही हाच नियम झालाय

     नवं मैत्र जुळलंच कि जुनं विसरायचं

     अन नकोसं झालेलं मैत्र दूर सारायचं

बेत ठरवतानाही एखादं कुणी नसतं

त्याचं असणं नसणंही निरर्थक ठरतं

     मजा मस्ती सदा सारे मिळून करतात

     आपल्याच कुणाला सहज विसरतात

त्यानंच समजून घ्यावं नेहमी म्हणतात

आपली चूक मात्र सगळेच लपवतात 

     होते जाणीव मैत्रीतल्या परकेपणाची

     नसे किंमत कुणास मन दुखावल्याची

सवय होते मग हळूहळू एकटेपणाची

अन लागते आवड एकांती जगण्याची 

     व्याख्या मैत्रीची पुस्तकातच वाचायची

     अन स्वप्नातल्या दुनियेत अनुभवायची

- स्नेहल मोडक

कविता

वारी

सरतो हळूहळू चैत्र, वैशाख, ज्येष्ठ अवतरतो मग पावन आषाढ श्रेष्ठ चालती वारकरी सारे वाट पंढरीची हाती टाळ अन गळा माळ तुळशीची सदा करती मुखाने विठ्...