होताच सांज उमटे पश्चिमेस केशरनक्षी
अन कोंदणी पाचूच्या उमले गुलबक्षी
पश्चिमरंग जणू सुमनांवरी ओघळतो
निकट तयांच्या मंद सुगंध दरवळतो
कलिकांसह गर्द गुलाबी पुष्प उमलले
मुग्ध कलिकेस तयाचे नवल भासले
अलवार उमलणे फुलाचे कळी पाहते
जणू आपुलेच प्रतिबिंब कळीस भासते
ओथंबून कलिका पुसते मग सुमनास
दिसेन ना मीही इतकीच सुंदर खास
कुसुम कलिकेचे गुज काव्यात गुंफते
अन क्षणातच मुग्ध कळी उमलू लागते
- स्नेहल मोडक
पसरली चोहीकडे गर्द मखमल हिरवीगार
तयात लाल मातीची पाऊलवाट वळणदार
शांत नितळ सरितेशी ही वळणवाट थांबते
अन पावलांस माझ्या अलवार जळ स्पर्शते
रानफुलांच्या नक्षीने हिरवी मखमल सजते
अन फिकट गडद रंगांनी पाचूसम चमचमते
गंधभरला आसमंतही नीरव शांत भासतो
अनाहत नाद जळाचा हलकेच कानी येतो
अवचित पाखरू एक लडिवाळ किलबिलते
मोहक चित्र हे सृष्टीचे अचानक सजीव होते
ऋतू पावसाळी अन सुरेख मोहोरलेली सृष्टी
तांबडमाती अन हिरव्या तृणावर खिळते दृष्टी
कुंचला निसर्गाचा रेखतो चित्र सफाईदार
तयात लाल मातीची पाऊलवाट वळणदार
- स्नेहल मोडक
