होताच सांज उमटे पश्चिमेस केशरनक्षी
अन कोंदणी पाचूच्या उमले गुलबक्षी
पश्चिमरंग जणू सुमनांवरी ओघळतो
निकट तयांच्या मंद सुगंध दरवळतो
कलिकांसह गर्द गुलाबी पुष्प उमलले
मुग्ध कलिकेस तयाचे नवल भासले
अलवार उमलणे फुलाचे कळी पाहते
जणू आपुलेच प्रतिबिंब कळीस भासते
ओथंबून कलिका पुसते मग सुमनास
दिसेन ना मीही इतकीच सुंदर खास
कुसुम कलिकेचे गुज काव्यात गुंफते
अन क्षणातच मुग्ध कळी उमलू लागते
- स्नेहल मोडक
No comments:
Post a Comment