श्रावण हा शब्द जितका लयदार तितकाच सारा महिना. वर्षाऋतूमधला एक महत्त्वाचा महिना. या काळात सतत उनपावसाचा सुंदर खेळ सुरु असतो. श्रावण जसा व्रतवैकल्यांचा तसाच भटकंतीचाही. या दिवसात कोकणातील भटकंती म्हणजे आपल्या डोळ्यांसाठी अनमोल नजराणाच. शुभ्र खळाळते निर्झर, गर्द हिरवी वनराई, दरीडोगंरातील दाट धुकं आणि उनपावसाचा सुंदर खेळ हे सारं मनात आणि छायाचित्रात साठवण्यासाठी कोकणात भटकणं गरजेचंच. विविध रंगांनी सजलेला श्रावण सर्वांना हवाहवासाच. कुणी या महिन्यातल्या व्रतवैकल्यांवर खुश असतं, कुणाला या महिन्यात केल्या जाणाऱ्या गोडधोड पदार्थांची आवड असते तर कुणाला निसर्ग सौंदर्य पहात भटकायला आवडतं. पण प्रत्येक जण आपापल्या परीने श्रावण साजरा करतोच.
रिमझिम रिमझिम श्रावणधारा
नभी उमटे इंद्रधनुचा पिसारा
पाचुच्या वनी धुंद ऋतू गंधाळला
निर्झरी अनाहत नाद झंकारला
रानफुलांनी पाऊलवाटा सजल्या
जलबिंदूनी तरुवेली मोहोरल्या
सर येताच अवचित तळी साचती
सोनकिरणांत सुंदर चमचमती
मुक्त विहरती वनात स्वप्नांचे पक्षी
कुसुमांवरी फुलपाखरांची नक्षी
मखमली साजात सृष्टी सुखावली
माहेरा लेक लाडकी विसावली
श्रावण हा सारा जणू धून मुरलीची
ऐकून नादती पैंजणे त्या राधेची
ऐकून नादती पैंजणे त्या राधेची
- स्नेहल मोडक
No comments:
Post a Comment