संगत

किलबिल पाखरांची

पहाटसमयी जागवते

उगवत्या दिनकरासंगे

नित्य चहापान ते रंगते

     आसपास येता पाखरे

     दाणापाणी तयास देते

     चिमण्या, बुलबुल, राघू

     दयाळ, नर्तक, चानी येते

टिपून दाणे उडती पाखरे

खेळात त्यांच्या मन रमते

असली जरी भाषा वेगळी 

भावना एकमेकांस कळते

     व्यस्त जीवनी दिनरातीस

     कधी संगतीस कुणी नसते

     एकलेपण मग जरी असले

     साथ पाखरांची सदा असते

आषाढस्य प्रथम दिवसे

जसे मेघदूत सहजच स्मरते

देत आदरांजली कालिदासांसी

संगतीत पाखरांच्या मन रमते

- स्नेहल मोडक