शब्द शब्द जपून ठेव बकुळीच्या फुलापरी
भावनांचे अमृतकण गंधाळल्या शब्दावरी
कधी घालिती शब्द घाव हळव्या भावनांवरी
कधी घालिती शब्दच फुंकर विध्द मनावरी
शब्दातूंन शब्द वाढतो पडते नात्यात अंतर
शब्दांवीणच संवाद घडतो अन जुळते मैतर
कोलाहलातच शब्दांच्या मन होतसे व्याकूळ
कुजबुजती शब्दच अन मन होतसे घननीळ
कधी शब्दच होती लाह्या अन तडतड उडती
कधी होती शब्द प्राजक्त हळूच सडा घालती
कधी शब्दच विद्युल्लता मनभावना जाळती
कधी होती शब्दच वीणा सप्तसूर झंकारती
शब्द शब्द जपून ठेव बकुळीच्या फुलापरी
भावनांचे अमृतकण गंधाळल्या शब्दावरी
- स्नेहल मोडक
No comments:
Post a Comment