दिस आषाढाचा पहिला
दाह वैशाखाचा सरला
जलद घन नभी दाटती
केकारव ते वनी घुमती
नभी खेळ विद्युल्लतेचा
साज जणू मेघमल्हाराचा
आषाढघन चिंब बरसती
अन तृषार्त सारे तृप्त होती
भूवरी इवली तळी साचती
कागदी नावा त्यात डोलती
सुंदर पाचूची शेते बहरती
सृष्टीवरी मखमल पांघरती
दिन विशेष हा आषाढाचा
कालिदासांच्या मेघदूताचा
आषाढमेघ ते दूत बनती
विरहवेदनेचा निरोप देती
आषाढात धुंद आसमंत
मनोमनी प्रीतीचा वसंत
पाऊसओल्या मातीवरती
प्रीतीसंगे हिरवे अंकुर येती
दिस आषाढाचा पहिला
दाह वैशाखाचा सरला
- स्नेहल मोडक
No comments:
Post a Comment