ओटा म्हणजे ओटा म्हणजे ओटा असतो
स्वयंपाकघराचा जणू तो श्वास असतो
रात्रंदिन ओट्यावरती अन्नपूर्णा नांदते
माझिया हातूनी जणू तीच सारे रांधते
कधी ओटा होतो माझा कागदी फलक
जलबिंदूंच्याच नक्षीची उमटते झलक
कधी ओटा माझे चिमुकले अंगण होतो
रेखल्या रंगावलीच्या रंगांनी सुरेख रंगतो
कधी ओटा माझा जणू छान तबक होतो
फळाफुलांच्या कोरीव रचनांनी सजतो
कधी ओटा होतो सागरतीरीची पुळण
शंखशिंपल्यांची त्यावर करते मी शिंपण
ओटा जणू माझी अमूर्त सखीच असते
गुज मम मनीचे त्यास सहजच कळते
ओटा म्हणजे ओटा म्हणजे ओटा असतो
स्वयंपाकघराचा जणू तो श्वास असतो
- स्नेहल मोडक
No comments:
Post a Comment