नभमेघात श्रावण दाटतो ग
मनामनात श्रावण फुलतो ग
क्षणात सरसर क्षणात उन
संगे वाजे मेघमल्हाराची धुन
खेळ उन पावसाचा रंगतो ग
मनामनात श्रावण फुलतो ग
पर्णात झरती मौक्तिकमाला
दरवळतो गंध मातीचा ओला
धरेवर अमृतवर्षाव होतो ग
मनामनात श्रावण फुलतो ग
हिरव्या पिकात हिरवी लाट
झुळझुळ वाहती शुभ्र पाट
रंग पाचूचा सुंदर खुलतो ग
मनामनात श्रावण फुलतो ग
रंगांच्या रानात स्वप्नांचे पक्षी
नभी खुलते इंद्रधनुची नक्षी
अल्लड वारा चहुकडे घुमतो ग
मनामनात श्रावण फुलतो ग
रानफुलांत पायवाटा सजती
अवखळ सरितेपाशी थांबती
केकारव मयुराचा घुमतो ग
मनामनात श्रावण फुलतो ग
मनामनात श्रावण फुलतो ग
- स्नेहल मोडक
No comments:
Post a Comment