वीणेवरली करांगुली सुंदर
कि वीणेचा झंकार अधिक सुंदर
उन पावसाचा खेळ सुंदर
कि सप्तरंगी इंद्रधनु अधिक सुंदर
अथांग निळा सागर सुंदर
कि फेसाळत्या लाटा अधिक सुंदर
रिमझिम रेशीमधारा सुंदर
कि मृदगंधी अवनी अधिक सुंदर
रंगबिरंगी रानफुले सुंदर
कि नागमोडी पायवाट अधिक सुंदर
नाजूक रातराणी सुंदर
कि मधुगंधी दरवळ अधिक सुंदर
पूर्वेचा सहस्ररश्मी सुंदर
कि सोनवर्खी किरणे अधिक सुंदर
शांत निरव निशा सुंदर
कि पुनवेचे शुभ्र चांदणे अधिक सुंदर
शब्दात गुंफले काव्य सुंदर
कि काव्यातला तरल भाव अधिक सुंदर
स्नेहल मोडक
No comments:
Post a Comment