सरतो हळूहळू चैत्र, वैशाख, ज्येष्ठ
अवतरतो मग पावन आषाढ श्रेष्ठ
चालती वारकरी सारे वाट पंढरीची
हाती टाळ अन गळा माळ तुळशीची
सदा करती मुखाने विठ्ठलाचे संकिर्तन
नाचती घेऊन डोईवरी तुळशी वृंदावन
कळत नाही चालताना कसे सरते अंतर
फेर, फुगड्या, रिंगण खेळती दमल्यानंतर
गावोगावी दुमदुमूतो विठ्ठलाचा नामघोष
स्वागत अन पूजनाचा उत्फुल्ल जल्लोष
अवघड दिवे घाटातून पार होती लिलया
जलद होती पाऊले सावळ्यास भेटाया
चंद्रभागे स्नान करुनी दर्शना उभे भक्त
नतमस्तक होता विठुचरणी मन होते तृप्त
- स्नेहल मोडक
