पहाटसमयी नभांगणी
दाटती मेघ सावळे
सुखावते हे मन
जणू होते बावळे
दिसेल वीजेची रेघ
क्षणभर लखलखेल
जणू ताशा वाजेल
अन कडाडतील मेघ
बरसतील जलधारा
चिंब भिजेल अवनी
मृदगंध दरवळेल
गंधाळेल धुंद वारा
आसुसलेलं हे मन
पावसाची वाट पहातं
पण हळूच मेघ विरतात
आकाश लख्ख होतं
दिवसाउजेडातलं स्वप्न
कृष्णमेघातच विरतं
वैशाखवणव्याची झळ
तनमन सोसत रहातं
- स्नेहल मोडक
No comments:
Post a Comment